LAOAG CITY – Ad-adda pay a limmawa ti tignay protesta iti Minneapolis ita a lawas kabayatan a kumarkaro ti tension iti nagbaetan dagiti mangiwaywayat ti tignay protesta ken dagiti otoridad kalpasan dagiti sumagmamano nga insidente ti kinaranggas.
Maysa a federal law enforcement officer ti nakapaltog ti maysa a lalaki a maipagarup a naglibas manipud iti maysa a traffic stop ken maipagarup nga immatake iti opisial ken kaduana ti dua a dadduma pay.
Malaksid iti daytoy, maysa a lalaki met ti napapatay iti maysa nga insidente kadagiti federal agents a nangdegdeg iti busor ti publiko.
Naammoan a ti insidente ket kagiddan idi Enero 7 no sadinno a natay ti agtawen ti 37 nga ina a ni Renee Good a napapatay dagiti miembro ti United States Immigration and Customs Enforcement (ICE).
Kinondenar ni Minneapolis Mayor Jacob Frey ni United States President Donald Trump ken ti administrasion daytoy iti panangiggemda iti situasion.
Inbatad ni Frey a mano pay a residente ken sumagmamano nga Amerikano ti masapul a matay wenno madangran sakbay a malpas ti operasion ti Immigration and Customs Enforcement.
Inakusaranna ni United States Vice President JD Vance a bimmisita iti siudad gapu iti saan a panangaramid ti wagas tapno maalay-ayan ti tension.
Dinakamat ti Mayor a ti 15 a ribu a demonstrador idi Biernes ket nagtalinaed a nakappia nga awan dagiti report kadagiti vandalism wenno kinaranggas a kumonkontra iti kinaranggas a tignay dagiti federal agents.
Kabayatanna, inrakurak ni Minneapolis Police Chief Brian O’Hara ti nayon a detalye maipanggep iti insidente ti pammaltog idi Sabado a nabigbig ti biktima kas maysa nga agtawen ti 37 ken residente ti Minneapolis nga awan ti criminal record-na malaksid kadagiti sumagmamano a traffic tickets.
Inpasigurado dagiti otoridad nga adda ti pammalubos ti lalaki a mangitugot ti paltog basar iti Minnesota law, mapalpalubosan ti open carry dagiti handgun basta addaan ti pammalubos.
Nupay kasta, inpetteng ti Department of Homeland Security (DHS) a maipagarup nga inasitgan ti biktima dagiti United States Border Patrol officers babaen ti maysa a 9mm semi-automatic handgun.
Kabayatanna, ginandat pay dagiti opisial nga agawen ti armas manipud iti suspek ngem daytoy ket limmaban a nangitunda ti pammaltog.
