LAOAG CITY – Inlawlawag ni Mr. Malcon Parado, Presidente ti Laoag-Solsona Drivers and Operators Association ti kaawan ti Comfort Room (CR) iti terminal ti Laoag-Solsona ditoy ciudad ti Laoag.
Daytoy ket kalpasan nga ado dagiti empleado ti Laoag City Hall nga agrekreklamo gapu ti kina-angseg ti lawlaw ti terminal.
Ti terminal dagiti addaan ti rota a Laoag-Solsona ket masarakan laeng iti abagatanen ti Laoag City Hall isut gapuna a saan a maliklikan a madalanan dagiti nasao nga empleado.
Inbatad ni Parado a nagdesisyon a maikkat ti CR iti terminal gapu ta agserserbi daytoyen kas public toilet.
Kuna na a ti metten CR iti terminal da ti pagdigdigusan ken us-usaren dagiti agnanaed iti lawlaw ti nasao a terminal ket saanda a kabaelan a bayadan ti 6-8 ribo a pisos a bill da ti danom ken kuryente.
Inkari ni Parado a kabayatan nga awan pay ti CR da ket kasarita na a naimbag dagiti driver a saanda nga umis-isbo iti nasao a terminal tapno saan a naangseg ti lugar.
