LAOAG CITY – Kinumpirmaran ni Major Ericson Bolusan, ti pannakangiwat ti Northern Luzon Command ti Armed Forces of the Philippines (AFP) nga adda ti naawat da nga impormasyon kadakuada mainaig ti maipagarop a kaadda dagiti terorista ditoy Region I.
Nupay kasta, kuna na a saanda pay a nai-validate a naimbag ti nasao nga impormasyon isut gapuna nga awan ti rumbeng a pakaalarmaan dagiti umili.
Inlawlawag na a ti naiparuk-at nga alert memo ket maibilang pay laeng a raw information wenno saan pay a kumpirmado ken manarimaan da pay laeng nga iban-validate, ngem masapol latta ti panagtalinaed nga alerto dagiti umili.
Innayon na a saanna nga ammo no kasanu a naipaima kadagiti saan nga otorisado nga indibidual ken isudan ti nangiwaras iti social media nga iti agdama ket pakaalarmaan dagiti umili.
Inpetteng pay ni Bolusan a naiget ti imbestigasyon da tapno maamoan no siasinno dagiti nangiwaras ti alert memo ken mapatawan ti maiyannatop a pannusa.
Inpasingked ni Bolusan a no bilang pudno a pudno ti report ket nakasagana ti AFP a mangprotehir kadagiti umili.
