LAOAG CITY – Inbatad ni Dr. Socorro Galanto, ti Provincial Director iti Technical Education and Skills Development a ti maysa kadagiti tututukan da ket iti benneg ti turismo.
Kuna na a daytoy ti rason no apay a kaadoan kadagiti gungundawayan a kurso dagiti agen-enroll iti Technical Education and Skills Development ket ti housekeeping training courses.
Inrakurak na a masapol a mangtraining da mainaig iti housekeeping tapno maipasigurado ti kinadalos ti pagyanan, seguridad ken ti panagbalin a komportable dagiti mangmangged nga arigna nga ibilang da daytoy kas pagtaengan da.
Inpakaammo ni Galanto nga apaman a malpas ti training course dagitoy ket makaala da ti National Certificate a mabalin da nga usaren kas advantage no sumrek da iti pagtrabahoan kas iti hotel ken restaurant.
Innayon na a daytoy ket tulong da kadagiti umili tapno al-alisto da a makastrek iti trabaho iti man local wenno abroad aglalo no adda ti national certificate dagitoy.
