LAOAG CITY – Pinawilan ti Korte ti celebrity a ni Tessa Prieto Valdes a mangiruar ti aniaman a negatibo a rakurak kontra iti dati a karelasionna a ni Angel Chua.
Iti inparuk-at a pammilin ti Makati City Regional Trial Court, pimmabor ti Korte ti kiddaw a gag order kontra ken ni Prieto kabayatan a maiwaywayat ti panagdengngeg ti kaso.
Immuna iti daytoy, nagpatulong ti kampo ni Chua iti Korte ken inaprobaranna ti inpila a mosyon ni Atty. Alexander Llanes Acain Jr. nga agkidkiddaw a mangiruar ti gag order gapu iti panaglabsing iti sub judice rule ni Prieto.
Iti babaen ti sub judice rule ket maipawil ti panangipaay ti aniaman a komento wenno statements iti maysa a kaso a nakapenpen, gagem daytoy a maprotektaran ti integridad ti legal process pakairamanan ti karebbengan ti agsinnungbangir a partido.
Naglabsing ni Prieto ti sub judice rule idi agpa-interview daytoy ken dinakamatna ti detalye ti kaso.
Nagyaman met ni Chua iti naiyisyu a gag order ti Korte para iti proteksion daytoy nangruna kontra iti fake news.
