LAOAG CITY – Nabagkong ti maysa testigo iti napasamak a pammaltog itay kallabes iti Sitio San Agustin Brgy. Elizabeth iti ili ti Dingras.
Nabigbig ti biktima a ni Amado Ballesteros, 49, addaan ti live in partner idinto a ti suspek ket ni Reynolin Gabug nga agpada a residente iti nasao a barangay.
Basar iti imbestigasyon ti PNP Dingras, bayat a gumatgatang ni Ballesteros iti sigarilyo iti maysa a sari-sari store iti nasao a lugar ket dita a kellaat a binagkong ni Gabug babaen iti saan pay a nadeterminar a natadem a banag.
Naamoan a ti motibo ti pammagkong ket dati a susik gapu ta ti biktima ket nagbalin a testigo iti napasamak a pammaltog itay kallabes no sadinno a kasinsin ni Gabug ti biktima a pimmusay.
Immuna a naitaray ti biktima iti Doña Josefa Edralin Marcos District Hospital iti ili ti Marcos kalpasan na ket naiyakar iti Gov. Roque B. Ablan Sr. Memorial Hospital ditoy ciudad ti Laoag ngem naiyakar manen iti Mariano Marcos Memorial Hospital and Medical Center iti ciudad ti Batac para iti naan-anay a pannakataming na.
Kabayatanna, naitaray met ti suspek iti Dingras District Hospital ngem naiyakar iti MMMHMC gapu iti sinagaba na a sugat nangnangruna iti luppo na.
