LAOAG CITY – Inladawan ni House prosecutor ken Iloilo Rep. Lorenz Defensor nga arigna “appetizer” pay laeng ti nagbalin a testimonia dagiti dua a dati a Government bank branch managers iti impeachment trial ni Vice President Sara Duterte mainaig iti maipagarup saan nga uno a panagusar iti confidential funds.
Segun ken ni Defensor, agpada nga inladawan dagiti dua a LandBank-Shaw branch manager Violeta Constantino ken dati a LandBank-DepEd branch manager Nenita Camposano kas “unusual” ti panag-en-cash dagiti dadakkel a gatad a tseke.
Iti nasao a panagdenggeg, kinumpirmaran ni Constantino a ti nasao a panag-en-cash dagiti uppat a tseke ti Office of the Vice President ket nagdagup ti P500 million, bayat a timmestigo met ni Camposano iti panag-en-cash ti tallo a tseke ti Department of Education nga adda ti pakabukelan a P112.5 million no sadinno ket paset dagitoy ti P612.5 million confidential funds a matingtingiting iti impeachment trial.
