LAOAG CITY – Naiyestablisaren ti testing center iti Border Control iti ili ti Badoc.
Daytoy ti kinumpirmaran ni Mr. Ryan Remigio, External Affairs Consultant ti probinsia ken mangidadaulo iti Border Checkpoint ti Ilocos Norte.
Segun kenkuana, dagus a nangrugi ti pannakaiyuswat ti testing kalpasan a naiyestablisar ti nasao a testing center.
Inbatad na nga iti immuna nga aldaw ket adda 48 a dimmalan ti antigen test no sadinno ket negatibo amin dagitoy idinto a no positibo ti rumuar a resulta ket saan daytoy a mapalubusan a sumrek ditoy probinsia.
Inlawlawag na a maibasar iti inparuk-at nga Executive Order No. 87-20 nga amin a sumrek ditoy probinsia ket rumbeng a mangipakita ti negative RT-PCR result ngem no awan ket kuyugen da a dumalan iti Testing Center para iti pannakaipadalan na ti antigen test nga agbayad daytoy ti sangaribu a pisos.
Kunana a maammoan ti resulta ti test iti uneg ti maysa nga oras.
Mainaig iti daytoy, kuna ni Police Captain Joseph Tayaban, Chief of Police ti PNP Badoc nga adda ti iskedyul iti Testing Center, Lunes agingga Biernes ket alas otso ti bigat agingga alas kuatro ti malem (8am-4pm), iti aldaw ti Sabado ket alas otso ti bigat agingga alas tres ti malem (8am-3pm) idinto nga iti aldaw ti Domingo ket naka-off duty dagiti adda iti Testing Center.
Kunana nga umuna mangala ti numero kadagiti pulis nga agbanbantay iti Border Checkpoint ken mapan agbayad iti Animal Quarantine sakbay a mapan iti Testing Center.
Inlawlawag na a ti General Requirements dagiti sumrek nga Authorized Outside Residence wenno APOR ket apaman a makasangpet iti Border Control ket rumbeng a mangipakita ti APOR Health Declaration Form, dumalan iti Thermal Scan ken Affidavit of Undertaking.
Inbatad ni Tayaban adagiti APOR a non-residents ditoy Ilocos Norte ket nasken nga addaan ti official business, appointment wenno travel order sakbay da a makastrek ditoy probinsia.
Inpetteng na a no ania ti nakailanad iti official business, appointment wenno travel order ket isu met ti kapaotna nga agtalinaed iti uneg ti probinsia ken nasken pay nga mangiprisentar ti 72-hour Valid RT-PCR result apaman a makastrek ditoy probinsia ken rumbeng a malimitaran ti movements wenno papananna kabayatan nga adda iti uneg ti probinsia.
Innayon na a dagiti APOR a residente ti Ilocos Norte a kalikagumna a makastrek ditoy probinsia ket rumbeng a mangipakita ti RT-PCR result ngem no awan ket dumalanda iti antigen test ken nasken a saanda nga agwarang-warang iti lugar a pagnanaedanda ken agtalinaedda laeng iti uneg ti 48 nga oras wenno dua nga aldaw.
Kabayatanna, iti naudi a datos ti PNP Badoc sipod idi Marso 30 ita a tawen agingga Agosto 29 iti agdama a tawen.
Ti kabuklan a bilang ti na-admit a returning residents ket 5,779 no sadinno a ti LSI ket 4,259 idinto a ti ROF ket 1,520.
