LAOAG CITY – Inbatad ni Konsehal Marvin Pascua, ti Chairman ti Committee on Peace and Order iti ili ti Solsona a naiget ti pannaki-koordinar da iti Philippine National Police (PNP) para iti iyus-uswat da a naun-uneg nga imbestigasyon tapno maamoan ti kinasiasinno ti suspek wenno dagiti suspek nga adda iti likudan ti bomb threat kadagiti opisyal iti nasao nga ili.
Segun ken ni Pascua, in-inuten nga adda ti paglawlawagan ti kaso gapu ta addan dagiti naestablisar da mainaig iti suspek wenno dagiti suspek.
Kuna na a babaen iti teknolohiya ket dandani dan maamoan ti lokasyon ti agipatpatulod ti pangta wenno dagiti texters.
Inpalgak na pay a ti adda iti likudan ti bomb threat ket possible nga adda laeng iti asideg dagiti opisyal a napatuludan ti pangta gapu ta ammo ti suspek ti manarimaan nga aktibidad da.
Innayon na a ti patien da a motibo ti texter ket ti mangbutbuteng laeng gapu ta no kayat ti maysa a tao ti agaramid ti krimen ket saanna a kasapulan nga ipublikar nga umuna ti plano na.
Mainaig iti daytoy, inpetteng ni Pascua a no bilang matuntun da ti texter ket ado dagiti mabalin na a sangwen a kaso no sadinno mabalin da nga aplikaran ti cyber warrant.
