LAOAG CITY – Napadayawan ti Thai a piloto iti online kalpasan a tinulunganna nga aganak ti maysa a pasahero kabayatan nga adda iti katengngaan ti flight.
Adda iti katengngaan ti flight manipud iti Taipei, Taiwan nga agturong idiay Bangkok, Thailand ti piloto a ni Jakarin Sararnrakskul idi binagaan isuna ti maysa kadagiti cabin crew nga adda ti emergency on board.
Segun iti cabin crew, adda ti nakita a pasahero iti Comfort Room nga agpasngayen.
Insigida a timmalaw iti cockpit ni Jakarin ket inbatina pay laeng ti co-pilot daytoy tapno mapan kitaen ti emergency.
Idi nakitana ti kasasaad ti pasahero, nagdesision daytoy nga isunan ti mangpaanak kenkuana gapu ta awanen ti oras tapno agsublida iti Taipei airport wenno ag-emergency landing iti kaasitgan nga eropuerto.
Daytoy ti umuna a gundaway ni Jakarin a makapadas ti nasao a klase ti emerhensia iti 18 a tawenna kas piloto.
Saanen a naidetalye no kasanona a pinaanak ti pasahero ngem natalgedna a natulungan a maipasngay ti maysa a baby boy.
Bayat iti flight, inawaganda nga “Sky baby” ti kaipasngay a maladaga.
Apaman a nakadissaag ti eroplano iti Suvarnabhumi International Airport, nirespondean dagiti naka-standby a medic ti pasahero ken ti maladagana. Insigida dagitoy a naikabil iti maysa nga ospital idiay Bangkok.
In-post ni Jakarin iti online account-na ti ladawanna kaduana ti maladaga.
Segun kenkuana, sobra daytoy a proud iti bagina gapu ta kinabaelanna ti agpaanak iti baet a daytoy ti umuna a gundaway a naaramidna daytoy.
