LAOAG CITY – Nagdudupudop ti sumurok 17 a ribu nga indibidual a nangiwayat ti tignay protesta idiay Bangkok, Thailand tapno kiddawen nga agikkaten iti puesto ni Prime Minister Paetongtarn Shinawatra a mangpakpakaro iti sasaaden ti ekonomia ti nasao a pagilian gapu iti problema iti maysa a border dispute kontra iti kaparanget a pagilian daytoy a Cambodia.
Inbatad ni Panthrep Pourpongpan, lider dagiti nagprotesta idiay Bangkok, kidkiddawenda ti panagikkaten ni Shinawatra gapu ta maipagarup nga awan ti makitkitada a problema malaksid iti panagbalinna a Prime Minister.
Daytoy ket kalpasan ti nagbalin a riribuk iti nagbaetan ti Thailand ken Cambodia mainaig iti pagin-innagawan a paset ti teritorio iti pagilianda.
Insigida a nagpanawagan dagiti grupo idiay Thailand nga agikkaten ni Shinawatra kalpasan a binabalawna ti maysa a kumander ti grupo dagiti armada ti Thailand ken agpakumbaba ken ni dati a lider ti Cambodia a ni Hun Sen iti maysa a na-leak a tawag iti telepono.
Inpawil idiay Thailand ti pampubliko a panangbabalaw iti militar gapu iti napigsa nga impluwensia daytoy iti pagilian.
Insigida met a dimmawat ti panagpadispensar ti Prime Minister kadagiti nagbalin a rakurakna kalpasan a na-leak iti publiko dagiti nagsaritaanda.
Iti agdama, mamati dagiti umili idiay Thailand a dikdiktaren ni Hun Sen ti pamilia ni Shinawatra.
