LAOAG CITY – Indeklarar ti Thailand ti martial law iti walo a distrito iti border da ti Cambodia.
Daytoy ket gapu iti agtultuloy a rinnupak iti nagbaetan dagiti tropa ti Thailand ken Cambodia iti paggiinnagawan a border.
Immunan a nagballaag ni Thailand acting prime minister Phumtham Wechayachai a ti conflict ket possible nga agtungpal iti nakaro a gubat.
Innayon na a ti komprontasyon ket nairamanen dagiti heavy equipments.
Inakusaran met ti Cambodia ti Thailand nga agus-usar kadagiti maiparit a cluster munitions iti border area iti uneg ti teritorio ti Cambodia.
Iti agdama, umaboten iti 16 a tattao ti kumpirmado a natay idinto a rinibo a residente ti napilitan a nagbakwit gapu iti mapaspasamak a riribok.
Mainaig iti daytoy, nagpanawagan ti Estados Unidos, China, Australia, ken ti Association of Southeast Asian Nations nga isardeng ti Cambodia ken Thailand ti panaglablaban da.
Kabayatanna, inrakurak ni Bombo International News Correspondent Lyle Sabado iti Thailand nga iti agdama ket maibilang a normal paylaeng ti sitwasyon iti nadakamat a pagilian.
Inlawlawag na a dagiti naibakwit a residente ket agtultuloy a makaaw-awat ti tulong manipod iti gobierno.
Nupay kasta, kuna na a ti nakaladladingit ket iramramanen dagiti tropa ti Cambodia ti pagtaengan dagiti sibilyan isut gapuna nga adon dagiti nadadael.
