LAOAG CITY – Agtultuloy ti rinnupak ti Thailand ken Cambodia uray inrakurak ni United States President Donald Trump nga immannugot ti dua a pagilian iti ceasefire.
Inbatad ni Thai Prime Minister Anutin Charnvirakul ken ni Trump a maipatungpal laeng ti ceasefire no ibabawi ti Cambodia dagiti amin forces daytoy ken ikkaten dagiti landmines.
Inlawlawagna babaen iti panangi-post-na iti social media nga agtultuloy ti Thailand a mangiwayat kadagiti military actions agingga a saandan a marikna ti panagamak ken panangpangta iti pagilian ken dagiti tattaoda.
Mainaig iti daytoy, kuna ti Defense Ministry ti Cambodia a binomba ti Thai fighter jets dagiti hotel buildings ken rangtay idinto nga adda dagiti sumagmamano a sibilian idiay Thailand ti nasugatan gapu iti Cambodian rocket attack.
Maipalagip nga adda ti 21 a tattao ti natay iti sabali manen a rinnupak ti Thailand ken Cambodia ken 700 a ribu nga indibidual ti naibakwit iti dua a pagilian.
Immuna iti daytoy, inkari ni Trump a pasardengenna ti rinnupak iti nagbaetan ti Thailand ken Cambodia.
