LAOAG CITY – Ni Gov. Imee Marcos laeng ti makaammo no makaaumay ni Presidente Rodrigo Duterte ken ti pamilya na iti maiwayat a panagkallaysa da Atty. Ferdinand Michael Marcos Manotoc kenni Ms. Carina Amelia Manglapus.
Daytoy ti inbatad ni Sangguniang Panlalawigan Member Matthew Marcos Manotoc.
Kuna na a ti laeng ina na ti makaammo kadagiti maimbitaran a national official nangruna kenni Duterte.
Nupay kasta, ti laeng ammo na ket makaatendar amin a kameng ti pamilya da.
Innayon ni Manotoc a makumikon ti ina na para ti panagsagana iti panagkallaysa ti kabsat na kenni Manglapus.
Maiwayat ti kasar intono Sabado idiay St. Augustine’s Church iti ili a Paoay.
Naamuan a tutukan met dagiti kameng ti Police Provincial Command para ti naiget a seguridad iti nasao nga okasyon.