LAOAG CITY – Mamati da Mr. Andy Mariano ken Mr. Joseph Salvosa a ti pannakapaay ket paset iti panagballigi ti biag.
Daytoy ti napaneknekanda kalpasan ti naunday a panawen a nangimatonda ti bukudda a negosio a nangrugi iti maysa a photography studio, bakeshop ken itan iti kaluklukat laeng a coffee and pasta dagitoy.
Segun ken ni Mariano, adu a pannubok ti nangsubok iti panagpatarayda iti negosio ngem saanda pulos a napukawan ti namnama iti baet ti kinarigat ti situasionda.
Inbatadna a namin-adu a daras a napaayda ngem amin dagitoy ket nagbalin nga adal ken inspirasion para iti ad-adda pay a pannakapatibker ti negosioda.
Kunana a saan nga alisto ti mangipasdek ti bukud a negosio nangruna no awan ti umdas a kuarta wenno pundo a mangsupusop kadagiti kangrunaan a kasapulan iti negosio.
Nupay kasta, inpetteng ni Mariano a gapu iti anus ken panagpursige ket amin a rigat, bannog ken sakripisio nga inbusbosda para iti panagdur-as ti negosioda ket in-inoten a magungun-odda ti nabayagen nga arapaapda a naballigi a negosio.
Mainaig iti daytoy, saan nga inlibak ni Mr. Salvosa a kinasapulanda ti umutang iti bangko tapno naan-anay a makaipatakder ti baro a pasdek para iti baro a negosioda.
Babaen iti daytoy, inlawlawagna ket natungpal ti maysa kadagiti kalikagumda a maaddaan ti baro, nalawlawa ken napinpintas a puesto dagiti negosioda nga ad-adda a makagutigot kadagiti kustomer a gumatang kadakuada.
Naammoan a maysa kadagiti ididiaya da Mariano ken Salvosa ket ti carbonara, spaghetti meat balls, malunggay pesto ken dadduma pay.
Innayon dagiti ag-business partner nga uray kasano ti rigat iti birok ti negosioda ket saanda nga itulek a ma-delay wenno maitantan ti sueldo dagiti empleadoda gapu ta ammoda ti kinapateg ti pannakaipaay ti sueldo iti naikeddeng nga aldaw.
Kabayatanna, ni Mariano ket nagturpos iti Bachelor of Science in Education idinto a ni Salvosa ket nagturpos iti iti Bachelor of Science in Nursing nga adayo nga amang iti lubong ti negosio nga ayanda iti agdama.
