LAOAG CITY – Manarimaan ti pannakapasayaat iti merkado publiko iti ili ti San Nicolas.
Daytoy ti inpakaammo ni Mayor Mike Hernando iti nasao nga ili.
Segun kenkuana, manarimaanen ti pannaka-tiles ti tiendaan iti ili ti San Nicolas no sadino daytoy a tiles ket saan a maigalis dagiti umili a mapan makitienda.
Inbatadna a babaen iti daytoy ket makita a napinpintas ken naur-urnos ti tiendaan no sadino manarimaan pay ti pannakapasayaat ti daan a Comfort Room iti merkado publiko.
Inlawlawagna nga apaman a malpas ti nasao a Comfort Room ket mairanta daytoy para kadagiti makitienda a maibilang a Person’s With Disability ken dagiti Senior Citizens.
Kunana nga addan ti uppat a naiestablisar a Comfort Room iti tiendaan sipod nagtugaw daytoy kas Local Chief Executive iti ili ti San Nicolas.
Mainaig iti daytoy, kuna ni Mayor Hernando a manarimaan pay ti pannakaiplastaren ti water tank iti sangoanan ti tiendaan nga isunto ti mausar dagiti food stalls ken dagiti nagduduma a pagtagilakoan iti merkado publiko.
Malaksid iti daytoy, inpasingkedna a mabalin pay a mausar ti water tank no bilang kasapulan ti nayon pay a suplay ti danum dagiti agresponde a kameng ti Bureau of Fire Protection pakairamanan ti panangbisibis kadagiti playground dagiti pagadalan.
Innayonna a ti makaut a pundo ket manipod iti Republic Act No. 7171 ken ti 20% Development Fund ti nasao nga ili.
Kabayatanna, naammoan nga umabot iti 100 a solar light ti maikabil kadagiti kangrunaan a kalsada iti ili ti San Nicolas.
