LAOAG CITY – Maminsan manen a mangiwayat ti transport group a Pagkakaisa ng mga Samahan ng Tsuper at Operator Nationwide (PISTON) ti sabali a 3-day transport strike kas protesta iti deadline ti franchise consolidation ken public utility vehicle (PUV) modernization program.
Segun ken ni Pagkakaisa ng mga Samahan ng Tsuper at Operator Nationwide Deputy Secretary General Ruben Baylon, ipakitada ti nationwide transport strike inton bigat, Abril 29 agingga Mayo 1 a kagiddan ti pannakasekebrar ti Labor Day. Abril 15 idi ag-transport strike ti Pagkakaisa ng mga Samahan ng Tsuper at Operator Nationwide kalpasan ti 2-day transport strike ti MANIBELA.
Inbatadna nga agtultuloy nga awan ti tignay ti administrasion Marcos iti panawaganda nga ibasura ti ingkapilitan ti franchise consolidation a padagsen para kadagiti jeepney drivers ken operators.
Inlawlawagna a kasapulanda nga aramiden nga ilaban ken saan a maikabil iti peggad ti pagbiagan iti sektor ti transportasion.
Naammoan a karaman kadagiti maapektaran a ruta ti Alabang, Baclaran, Sucat, Taft Avenue, Agoncillo, Monumento, Novaliches, Litex, Anonas, Katipunan ken Philcoa.
Inpasigurado ni Baylon nga agbiaheda latta inton Mayo 1 iti baet dagiti pangta a tiliwenda kalpasan ti deadline ti franchise consolidation inton Abril 30.
Nangipakita met ti suporta ti labor group a Kilusang Mayo Uno iti panangisayangkat ti transport strike ti Pagkakaisa ng mga Samahan ng Tsuper at Operator Nationwide inton bigat idinto nga inton Mayo 1 ket agmartsa dagitoy manipod iti University of Santo Tomas nga agturong iti United States Embassy iti Roxas Boulevard.
Immunan nga inbatad ni Presidente Ferdinand “Bongbong” Marcos Jr. a saanen a maiyalud-od pay ti franchise consolidation ket imbes a kasapulanen nga isayangkat daytoy para iti panagdur-as ditoy pagilian.
