LAOAG CITY – Inpakaammo ni Mr. Brett Matias, coffee shop owner iti bypass road ditoy siudad ti Laoag a time management ti kangrunaan a kasapulan no sumrek iti maysa a negosio.
Segun kenkuana, dimmalanda ti tallo nga aldaw a panagsanay para iti baro a negosio a coffee shop tapno adda ammoda dagiti rumbeng nga aramidenda iti panangakomodar kadagiti kustomerda.
Inbatadna a pinilida ti kape kas negosioda gapu ta mamatida nga in demand daytoy iti agdama ken birburuken dagiti saan laeng a nataengan no di ket dagiti pay agtutubo.
Inlawlawagna nga ita a panawen ket saan laengen a para iti bigat ti kape no di ket mabalin pay daytoyen iti rabii.
Malaksid iti daytoy, kunana a ti panaginum ti kape ket saan laengen a para iti nalamiis a paniempo no di ket uray pay nabara a panawen.
Innayonna a dakkel a paset ti panagkape ti biag dagiti tattao isu a napintas daytoy a negosio gapu ta birbiruken ti bagi dagiti kustomer ti templa ti kape nga ididiayada.
