LAOAG CITY – Inburay ni Mrs. Kharen Vidad, Instructor iti Mariano Marcos State University – College of Teacher Education no kasanu na a maar-aramid amin dagiti trabaho ken responsibilidad na kas maysa nga ina, asawa ken mangisursuro.
Inadmitir na a narigat ti sitwasyon na ngem kasapulan na ti agbalin a natibker ken ammo na a bingbingayen ti oras na wenno ti makunkuna a “time management” tapno maaramid na amin a responsibilidad na para kadagiti estudyante na, ken dagiti annak na aglalo ket Overseas Filipino Worker ti asawa na.
Kuna na pay a masapol a sursurwen na amin a trabaho iti uneg ti balay kas ti panagtarimaan kadagiti madadael a paset ti pagtaengan ken dadduma pay gapu ta awan ti sabali a mangaramid no saan nga isuna.
Inlawlawag na a kas maysa nga ina, inkari na a saan nga agbalin a lapped ti trabaho na no maipapan iti oras ken panawen na kadagiti annakna.
Kuna na a saanna a kayat a mapadasan dagiti annak na ti naglabasan na a naipaidam kenkuana ti oras dagiti nagannak na kadagiti aktibidad iti pagadalan gapu ta mabalin da a mabain da a mapan agatendar, iti rason nga awan ti maipanakkel da.
Inrakurak na nga inkari na iti bagina nga awan ti palabsen na nga aktibidad dagiti annak na iti pagadalan isut gapuna a no kasapulan nga ag-leave ket aramiden na tapno awan ti matakaw na nga oras ti gobierno iti panagtrabaho na kas mangisursuro.
Inpakaammo pay ni Vidad a pinadas da ti nangala ti tutor dagiti annak na ket dakkel met ti naitulong da, ngem nautub na a sabsabali latta no mismo a nagannak ti mangisuro ken mangbayabay dagiti annak kadagiti assignments ken projects da gapu ta biruken da ti presensya dagiti nagannak da.
Kabayatanna, inbatad ni Vidad a saan a dagiti pammigbig ken achievements ti ibilangna laeng a balligina iti panagisuro.
Para kenkuana, ti kangrunaan nga ibilangna a balligi na ket no agsubli kenkuana dagiti estudyante na tapno agyaman iti panagballigi da iti panagbiag gapu iti pannarabay na idi agad-adal da paylaeng, kaipapanan daytoy a dimngeg da kenkuana ken panagriknana ket arigna dakdakkel payen ti nagbalin nga akem na ngem dagiti nagannak da.
