LAOAG CITY – Kwinestionaran ni Senador Bong Go ti ‘timing’ ti pannakaiparuk-at ti warrant of arrest kontra ken ni Vice President Sara Duterte mainaig iti kaso a grave threats.
Masiddaawan ni Go no apay ita laeng naiparuk-at ti warrant no sadinno nabayagen a napasamak ti insidente a naggapuanan ti kaso.
Dinakamat pay ti Senador a nairuar ti warrant kabayatan ti agtultuloy nga impeachment trial ni Duterte iti Senado.
Inbatad ni Go a mamati daytoy a mabaelan ni Duterte dagiti kaso a sangsangoenna ken gagangay dagitoy a kasasaad ken ni Duterte ken kabaelanna a sangoen dagiti pannubok iti tengnga ti impeachment ken ti nagsina a kriminal a kaso.
Maipalagip a nangitunda daytoy a kaso iti nagbalin a pangta ni Duterte idi Nobiembre 2024 kadagiti biag da Presidente Ferdinand “Bongbong” Marcos Jr., First-Lady Liza Araneta-Marcos ken ni dati a House Speaker Martin Romualdez.
Gapu iti daytoy, nangiyuswat ti imbestigasion ti Department of Justice ket idinto a nangipila ti tallo a bilang ti grave threats kontra iti Bise Presidente.
Naamoan a ti umuna a paset ti Agosto, inrekomendar dagiti prosecutor ti P120,000 a piansa para iti kada kaso.
Kabayatanna, nangiparuk-at ti warrant ti Quezon City Regional Trial Court Branch 98 kalpasan ti pannakakitada ti probable cause tapno maikabil ti panangusig ti Bise Presidente. Naikeddeng met iti P120,000 a piansa iti tunggal bilang.
Immunan a kwinestionnaran ti partido ni Duterte iti hurisdiksion ti korte ken nangipila ti motion to quash. Kabayatan nga inbatad ti abodagona nga awan gandat ni Duterte a liklikan iti linteg ken usarenna daytoy dagiti legal a remedio a nailatang kenkuana.
Mainaig iti daytoy, saan a nakita ni Duterte iti Quezon City Regional Trial Court idi kalman, Setiembre 4 kabayatan ti pannakaiparuk-at ti warrant.
Nupay kasta, nirespetar ti Department of Justice ken ti Malacañang ti nagbalin a desision ti korte.
Kuna pay ti Palasio a saan daytoy makibiang iti proseso ti huwes.
