LAOAG CITY – Naidatag dagiti kondisyon ti Timor-Leste sakbay a naipalubus a maideportar ti napadisi nga agpanpanday linteg a ni Arnie Teves Jr.
Daytoy ti inbatad ni National Bureau of Investigation (NBI) Director Jaime Santiago.
Kuna na a karaman ditoy ti certificate of handover a mangimanmando a masapol a natauan ti pannakatrato ken ni Teves ken saan a maibalud ti nasursurok ngem 40 a tawen.
Inlawlawag pay ni Santiago nga iti babaen ti Article 70 ti Revised Penal Code, malimitaran ti 3-fold rule ti pakabuklan ti panawen a mabalin nga iserbi ti maysa a convict ti sentensya na iti pagbaludan uray pay kadagiti agsusukot a kaso.
Adda iti 40 a tawen ti maximum a kabayag ti pannakaibalud ti maysa a convicted iti baet ti kaado wenno kadagsen ti sentensya kenkuana.
Ti nayun pay a kondisyon ket saan a rumbeng nga agbalin a subject ti torture ni Teves ken masapol a maibalud iti detention facilities a maiyataday iti international standard.
Malaksid kadagitoy ket naibilin pay a masapol a saan a a masentensyaan ti dusa a patay ni Teves ken rumbeng a maipaayan ti patas ken public trial kas maiyallubog ti paglintegan ti Pilipinas.
