LAOAG CITY – Mangipatulod ti Timor Leste ti 120-man team para iti rehabilitation efforts kadagiti naapektaran a lugar ditoy Pilipinas kalpasan ti nalawa a pannakadadael nga inbati ti Bagyo Tino.
Basar iti Department of Foreign Affairs (DFA) iti maysa nga statement, sitatallugod nga inawatda daytoy a rakurak ti Timor Leste, ti kabaroan a miembro ti Association of Southeast Asian Nation (ASEAN).
Karaman kadagiti ipatulod ti Timor Leste dagiti engineer ken firefighters tapno mangasistir iti panagdalus ken rehabilitasion kadagiti naapektaran a lugar.
Nangipadanon ti Department of Foreign Affairs ti napalaus a panagyaman kadagiti nangidiaya ken nag-commit ti humanitarian assistance manipud iti international community para iti relief ken recovery operations kalpasan ti inbati a nalawa a pannakadadael gapu iti bagyo idiay Cebu ken dadduma pay a paset ti akin-tengnga a paset ti pagilian.
Immunan a nangipeksa ti Estados Unidos ken dadduma pay a gobierno manipud idiay Canada, Australia ken Japan tapno tumulong iti recovery efforts ti pagilian pakairamanan ti pannakipagladingit ti Sweden ken Russia kadagiti pamilia dagiti biktima ti napigsa a bagyo.
