LAOAG CITY – Saan laeng a dagiti babbai a nag-menopause ti makapaspasar ti hot flashes no di ket pakairamanan pay kadagiti lallaki a nababa ti testosterone levels.
Basar iti Harvard Health, makarikna ti hot flashes dagiti lallaki nangruna kadagiti dumaldalan iti prostate cancer treatments a mangpatpatay iti testosterone tapno malappedan ti panagwaras ti cancer cells.
Para kadagiti babbai, ti hot flashes ket ti kellaat a panagbara ti rupa, tengnged ken barukong ken mabalin a a mangitunda ti panagleng-et ti kudil a rason tapno saan nga agbalin a komportable ti marikna.
Naammoan a ti hot flashes ket gapu iti panagsukat ti hormone levels ken isu ti kangrunaan nga estrogen levels a mapaspasamak no ag-menopause, perimenopause ken no masikog.
Inpakaammo dagiti eksperto tapno mapalag-an ti epekto ti hot flashes ket nasken a nalamiis ti pagtaengan ken no awan ti airconditioner, luktan dagiti tawa tapno sumrek ti angin.
