LAOAG CITY – Nangipila ti National Bureau of Investigation (NBI) ti 16 a criminal complaints kontra ken ni Yang Jianxin ti kabsat ni dati nga economic adviser Michael Yang.
Basar iti Inter-Agency Council Against Trafficking, sumangsango da Yan Jianxin wenno mas am-ammo iti nagan nga Antonio Lim y Maestrado, Antonio M. Lim, Tony Lim ken Tony Yang kadagiti kaso a falsification, perjury ken panaglabsing iti Commonwealth Act 142 wenno Anti-Alisa Law.
Naipila ti reklamo iti Office of the City Prosecutor ti Cagayan de Oro idi Oktubre 17, 2024.
Maipalagip nga idi Setiembre 19, 2024 idi inarestar ti Bureau of Immigration ni Yan Jianxin ken naipasango iti Senado ken House of Representatives iti panangimbestigar iti human trafficking ken iligal Philippine Offshore Gaming Operators (POGO).
Innayon pay ti Inter-Agency Council Against Trafficking a ti 16 a reklamo ket maipadalan iti preliminary investigation ken namnamaenda ti ad-adu pay a reklamo ti maipataw kadagiti sumarsaruno nga aldaw.
