LAOAG CITY – Inpa-contempt ti House Quad Committee ni Tony Yang.
Ti nasao nga addang ni Laguna Rep. Dan Fernandez ket saanen a kinontra dagiti padana nga agpanpanday linteg.
Inaprobaran met ti mosyon ni Manila Rep. Bienvenido Abante a maibalod iti Quezon City Jail ni Yang.
Sakbay ti mosyon ket namin-adu a daras a sinaludsod ni Fernandez ni Yang no am-ammona ti negosiante a ni Allan Lim a maibagbaga a kasosyo daytoy iti rice milling business idiay Cagayan de Oro ngem naglikudan daytoy ni Yang.
Gapu iti kanayon a panagkedked ni Yang kadagiti isyu a kalikagum a mailawlawag dagiti agpanpanday linteg isu a nagdesisionda a ma-cite in contempt laengen daytoy.
Maipalagip nga idi Setiembre 19 idi naarestar ni Yang gapu iti mission order a kukuana ti Philippine Sanjia Steel Corporation a ti bodega a naipasdek idi 2018 idiay Cagayan de Oro kageddan ti Philippine Offshore Gaming Operator hubs iti Bamban, Tarlac ken iti Porac, Pampanga.
Naammoan a kabsat isuna ni dati a Presidential Economic Adviser Michael Yang a maitudtudo nga adda iti likudan dagiti nalawa a crime network ditoy probinsia.
