LAOAG CITY – Maysa a naidumduma a wagas iti taraon ti panagprito kadagiti toothpick ti mapagsasaritaan dagiti netizen idiay South Korea.
Sumagmamano nga influencers ken food vloggers ita idiay South Korea ti nangi-upload kadagiti video-da iti panagluto iti Youtube no sadinno nga ipritoda ti toothpick, kalpasanna ikabilda daytoy kadagiti ramen kas iti cheese powder ken kanenda a kasla cherry.
Ti toothpick nga us-usaren dagiti Youtubers ket saan nga ordinario a kayo a toothpick. Maysa daytoy a kita ti toothpick a makaay-ayo iti aglawlaw a naaramid iti cornstarch wenno potato starch.
Gapu iti umad-adu a tattao nga agprito ken mangan iti toothpick idiay Korea, nangipaulog dagiti opisial ti salun-at ti South Korea iti pakdaar nga ipalagipda kadagiti umilida a saan a natalged ti pannangan ti toothpick.
Iti baet ti pakdaar ti gobierno, agtultuloy ti panagparang dagiti video-na iti panagluto iti YouTube.
Kabayatanna, kuna ti kaaduan kadagiti nakaraman a narangrangkis ken kasla prito a rice cake ti ramanna.
