LAOAG CITY – Balligi a naarestar ti maibilang a Top 1 Most Wanted Person ditoy Ilocos Norte kalpasan a naglemmeng iti nasurok dua a dekada gapu iti kaso na a murder.
Segun ken ni PMaj. Christian Felix, Hepe ti Philippine National Police iti ili ti Burgos, ti akusado ket nabigbig nga agtawen ti 51, naasawaan, tricycle driver, tubo ti Brgy. Davila, Pasuquin ken nakemmeg idia sidiay Brgy. Bagong Nayon, Antipolo City, Rizal.
Inbatadna a nakemmeg ti akusado babaen ti bileg ti Warrant of Arrest a naiyisyu idi Nobiembre 8, 2021 ken inparuk-at ti Presiding Judge ti RTC First Judicial Region Branch 19, Bangui, Ilocos Norte.
Inpakaammo ni Felix a namunganay ti kaso ti akusado gapu iti pannakapapatay ni SPO1 Rolean Padaong iti Pasuquin Municipal Police Station idi Septiembre 20, 2001 babaen iti pannakabagkong na iti Brgy. Davila iti ili ti Pasuquin.
Nagtalinaed iti kustodyar ti PNP-Burgos ti suspek ken awan ti nairekomendar a piyansa para iti kaso na.
