LAOAG CITY – Balligi a naarestar ti Top 1 Most Wanted Person iti probinsya nga addaan ti 19 counts iti kaso a rape.
Iti inyuswat a press conference ti INPPO, inpakaammo ni PLt. Col. Randy Baoit, Deputy Provincial Director for Operations a ti suspek iti alyas “Rafael”, tubo iti Brgy Barbaquezo iti ili ti Carasi ngem agdama nga agnanaed iti Purok 5, Sitio Bangard Area, Brgy. 178 Caramin, Caloocan City.
Naiserbi ti warrant of arrest iti pagnanaedan ti suspek ken inparuk-at ni Hon. Judge Conrado Rufols iti RTC Branch 16 ditoy siudad ti Laoag ken napetsaan idi Setiembre 17.
Awan ti piyansa a nairekomendar iti suspek.
Immuna iti daytoy, inpakaammo ni Baoit a kaaduan a nangaramidan ti suspek iti panangrames ket nagduduma a babbai ditoy probinsya.
Innayun na a babaen iti koordinasyon ti Police Intelligence Unit, Regional Intelligence Division ken tracker ti INPPO ket naduktalan ti paglemlemmengan ti suspek.
