LAOAG CITY – Inbatad ni Electrical Engr. Wendell Pascual, taga Sitio Dipadi, Barangay Capurictan iti ili ti Solsona, a saanna a ninamnama a karaman kadagiti Top 10 iti kalepleppas nga Electrical Engineering Licensure Examination.
Ni Engr. Pascual ket nagturpos iti Mariano Marcos State University (MMSU) iti ciudad ti Batac.
Inlawlawag na a gapu iti kinarigat ti eksaminasyon ket ado dagiti saanna a sigurado nga insungbat na ngem binuybuyugan na lattan ti nainpapusoan a kararag.
Kuna na a sakbay iti eksaminasyon ket nagturong iti ciudad ti Baguio no sadinno a nagtalinaed iti balay ti ikit na iti sumagmamano a bolan ken ditoy a nagreview babaen iti online.
Inadmitir na pay a nagpasar idi ti depresyon gapu iti pannakaitantantan ti panageksamen na iti board gapu iti mapaspasaran a pandemya gubuay ti covid-19 virus.
Nupay kasta, nasubadan amin dagiti rigat na gapu ta saanna laeng a naipasa ti eksaminasyon no di ket karaman pay kadagiti napagasatan a nagbalin a Top 10.
Nagbalin met nga emosyonal ni Engr. Pascual kabayatan ti pananglagip na kadagiti nagpasaran na a rigat na idi agad-adal pay laeng agingga a nageksamen.
Inyistorya na a lima a tawen a nagbalin nga scholar ti DOST isut gapuna a no maikkan ti gundaway nga agserbi iti gobierno ket nakasagana a mangawat.
Saanna met a nalipatan a nagyamanan dagiti tattao a timmulong kenkuana kangrunaan na ti pamilya ken ti lola na a kinadkadwa na gapu iti sakripisyo, pinangpadakkel da kenkuana a nasayaat ken panangipaay da ti napintas a masakbayan.
Mainaig iti daytoy, inbaga ni Engr. Pascual nga online man wenno face to face ti panagreview no pursigido ti maysa a tao nga agreview ket awan ti agbalin a problema ken saan nga agbalin a lapped tapno saan a magun-od ti arapaap.
