LAOAG CITY – Balligi a naarestar ti maibilang a Top 10 Regional Level iti Anti-Illegal Drug Buybust Operation iti Brgy. Aglipay iti siudad ti Batac.
Nabigbig ti suspek a ni Eric Laga, agtawen iti 55, naasawaan, awanan ti trabaho ken residente iti nasao a barangay.
Natiliw ti suspek kalpasan a maipagarup a naglako daytoy ti maysa nga heat sealed transparent plastic sachet a naglaon ti maatap a shabu nga agbalor ti sumurok tallo a ribu a pisos manipud iti maysa a pulis a nagpammarang kas poseur buyer.
Malaksid iti daytoy, nakumpiskar pay manipud iti suspek ti 16 a pedaso nga heat sealed transparent plastic sachet a naglaon ti mapapati a shabu.
Naammoan a ti suspek ket drug surrenderee idi 2017 ken maibilang nga High Value Target.
Kabayatanna, naarestar ti nasao a suspek babaen iti nagtipon a puersa ti Batac City Police Station ken Provincial Drug Enforcement Unit.
