LAOAG CITY – Kinumpirmaran ni Police Lt. Col. Mar Louise Bondoc, ti chief of police iti ciudad ti Batac ti pannakatiliw ti maibilang kas Top 10 Regional Target ken karaman iti High Value Target List ti PDEA iti naiyuswat a drug buy-bust operation iti MMSU housing iti Brgy Tabug iti nasao a ciudad.
Inbatad ni Bondoc a ti operasyon ket inyuswat ti nagtitipon a pwersa ti PNP-Batac, PDEA PRO1 AIU, RDEU, PDEU, PIU, PNP-Pinili, PNP-Currimao MPS ken NICA.
Binigbig ni Bondoc ti suspek a ni Brilliant Obiano y Balas, agtawen ti 35, naasawaan, feeds technician ken residente metlaeng iti nasao a barangay.
Inlawlawag ni Bondoc nga insayangkatan da ti operasyon ni Obiano kalpasan ti naunday a panawen a panangmonitor ti CDEU ken PDEA no sadinno a napaneknekan nga aglaklako ti maipagarop nga illegal a droga, partikular ti marijuana.
Innayon na a basar iti rekord da ket damo ni Obiano ti naisayangkatan ti operasyon.
Iti agdama, kuna ni Bondoc nga adda iti kustodyar ti PDEA ni Obiana ken maisagsaganan ti reklamo a maipila kontra kenkuana.
Mainaig iti daytoy, inpakaammo ni Bondoc a nakumpiskar da iti operasyon ti dua a dadakkel a sachet a naglaon ti maipagarop a marijuana a mapatta-patta nga agbalor ti 16,600 a pisos; sangaribo a pisos a nausar iti operasyon, nangisit nga sling bag, maysa nga improvise glass tube tooter, maysa nga improvise glass tube pipe, maysa a nalabbaga a cylindrical plastic bag, maysa a plastic bag, maysa a rose gold unit I phone cellular phone ken maysa a lighter nga agmaris ti berde.
