LAOAG CITY – Balligi a naarestar ti Top 2 carnapper iti Provincial Level iti Brgy. 2 Garreta iti ili ti Badoc.
Binigbig ni PNP-San Nicolas chief PMaj. Eduardo Santos, ti akusado nga agtawen ti 30, awanan asawa, bus driver ken residente iti Brgy. 18-B, Mabusag Sur iti ili ti Badoc.
Inbatadna a naarestar daytoy babaen iti bileg ti Warrant of Arrest nga inparuk-at ni Hon. Edgar Asistin, Assisting Judge iti RTC Branch 140 idiay Antipolo City, Rizal ken napetsaaan idi Oktubre 28 gapu iti panagsalungasing iti kaso a carnapping iti Section 3 ti Republic Act 10883 wenno ti new anti carnapping act of 2016.
Mainaig iti daytoy, inpakaammo ni Santos a nairekomendar ti 300 a ribu a pisos a piyansa ti akusado para iti temporario a pannakawaya-wayana.
Maipalagip nga immunan a balligi a naarestar iti met laeng ili ti Badoc ti Top 1 Carnapper ditoy Ilocos Norte.
Kabayatanna, naamoan a ti PNP-San Nicolas ti nangidaulo iti pannakarestar ti akusado.
