LAOAG CITY – Nagballigi a nangtiliw dagiti otoridad iti maibilang a Top 2 most Wanted Person ditoy probinsya kalpasan ti 17 a tawen a panaglemlemmeng na.
Ti akusado ket sumangsango iti kaso a 28 a bilang ti estafa ken natiliw daytoy iti ili ti Pasuquin babaen ti bileg ti warrant of arrest nga inparuk-at ni Hon. Manuel Arcel Jr., ti presiding judge iti RTC Branch 65 ditoy ciudad ti Laoag.
Binigbig ni Police Major Antonio Marzan, ti chief of police iti ili ti Pasuquin ti akusado a ni Rodrigo Dancel, agtawen ti 54, awanan ti asawa ken residente iti Barangay Susugaen iti nasao nga ili.
Nairekomendar ti 672 a ribo a pisos a piyansa ti akusado para iti temporaryo a pannakawaya-waya na.
Naamoan a dagiti nagbalin a biktima ti akusado ket manipod iti nagduduma nga ili ditoy probinsya.
