LAOAG CITY – Balligi ti pannakatiliw ti Top 1 Most Wanted Person ti Ilocos Norte idiay Taguig City.
Daytoy ket babaen ti nagtitipon a pwersa ti PNP-Badoc nga indaulwan ni Police Major Joseph Tayaban, Pinagsama Police Station Sub-station 3, Provincial Intelligence Unit, INPPO, Regional Intelligence Unit 1 ken CIDG.
Nabigbig daytoy a ni Jeffrey Guzman, tubo iti ili ti Badoc ken agdama nga agnanaed idiay Taguig City.
Ummuna iti daytoy, adda ti standing warrant of arrest ni Guzman a napetsaan ti Mayo 9, 2019 nga inparuk-at ti RTC-Branch 17, Batac City, Ilocos Norte.
Iti Press Conference ti INPPO, kuna ni Police Col. Julius Suriben a ni Guzman ket miembro iti gun for hire ken isu ti rumrumuar a nangpaltog a nakatayan ti maysa a seaman bayat nga adda iti merkado publiko iti ili ti Badoc iti kallabes.
Segun kenni Suriben, karaman ni Guzman kadagiti sumagmamano a pammaltog ditoy probinsya ken iti sabali pay a lugar, adda pay ti kaso na panagikot ti loss firearms.
Kunana a ti grupo a nakikappengan ni Guzman ket nabayagen nga agop-operar.
Inlawlawag na a gapo iti pannakatiliw ni Guzman, nakissayan manen ti maysa kadagiti tattao a karaman iti iligal nga aktibidad ken mangnamnama nga agserbi daytoy a mensahe iti siasinno man a karaman iti gun for hire activities a sadinno man ti ayan da ket matiliw latta dagitoy.
Kabayatanna, kuna ni Tayaban nga adda ti naawat da nga impormasyon ken nakikoordenar da kadagiti lugar nga ayan ti suspek agingga a nakumpirmaran daytoy rason nga inpatungpal da ti operasyon.
Kinumpirmaran ni Tayaban nga innem a krimen ti nakairamanan ni Guzman ngem dua ti na-dismiss kadagitoy.
