LAOAG CITY – Nagballigi ti nagtitipon a pwersa ti Philippine Drug Enforcement Agency-Ilocos Norte Provincial Office (PDEA INPO), Philippine Drug Enforcement Agency- Regional Office I – Airport Interdiction Unit (PDEA RO I- AIU), Ilocos Norte Police Provincial Office ken Philippine National Police iti ili ti Marcos a nangtiliw iti maibilang a Top 2 Regional Target drug personality.
Binigbig ni Agent Harry Cariño iti Provincial Drug Enforcement Agency (PDEA) ditoy probinsya ti subject ti operasyon a ni Richard Alsad Dichoso, addaan ti umno a tawen, driver iti kompanya ti softdrinks ken residente iti ili ti Solsona.
Segun ken ni Agent Cariño, natiliw ni Dichoso iti naiyuswat a drug buy-bust operation iti paset ti Barangay Daquiag iti ili ti Marcos.
Inbatad ni Agent Cariño a nakumpiskar iti ikot ni Dichoso ti maysa a sachet nga agdagsen ti sumurok-kumurang a 0.5 gramo ti maipagarop a shabu nga agbalor ti P4,400.00.
Inpalgak ni Agent Cariño a dagiti dadduma nga items nga inbatad ti suspek iti nagpammarang a poseur-buyer ket saanda a nakita kalpasan nga inbelleng ni Dichoso iti taltalon.
Inpakaammo ni Agent Cariño nga idi paylaeng 2022 a monmonitoren da ti suspek no sadinno a nagpositibo daytoy ti maipawil a droga iti pagtrabahoan na isut gapuna a sinuspenso da daytoy.
Kuna na nga isupay ti nakaammoan ni Dichoso nga adda iti listaan ti Philippine Drug Enforcement Agency rason a simmuko ken insardeng na paylaeng ti illegal nga aktibidad na.
Nupay kasta, kalpasan laeng ti sumagmamano a bolan ket maipagarop a nagsubli manen iti illegal nga aktibidad ti suspek nga isu metten ti nakatiliwan na.
Iti agdama, nagtalinaed ti suspek iti kustodyar dagiti otoridad kabayatan a maisagsagana ti reklamo a panaglabsing iti Section 5 Article II ti Republic Act 9165, wenno ti Comprehensive Dangerous Drugs Act of 2002.
Mainaig iti daytoy, naglikudan ni Dichoso ti alegasyon kenkuana ken inpetteng na a saanna a bagi ti naala nga ebidensya iti ikotna.
Inadmitir na a napadasan na ti nagusar ti droga ngem nabayagen sipud insardeng na.
