LAOAG CITY – Inlawlawag ni Police Captain Carlo Abing, hepe ti PNP Sarrat ken Team Leader ti operasyon ti pannakatiliw ti Top 3 ken Top 4 most wanted person iti ili ti Solsona.
Kuna na nga idi Hulyo 1, adda ti nakita da a lalaki a magmagna iti ili ti Sarrat ken makita a mabisbisinan ken nabannog.
Idi sinaludsod da no sadinno a lugar ti naggapuan na ket naggapu daytoy iti Bulacan ken taga Solsona.
Gapu iti daytoy, intawag ni Abing tapno makumpirmaran kailian da daytoy ket dita a naibaga ti PNP Solsona kenkuana a wanted person daytoy.
Segun kenni Abing, nabayag a naglemmeng ti akusado kalpasan ti pannakapapatay ti maysa a Japanese National nga agnanaed iti ili ti Solsona.
Napasamak ti pammapatay idi Mayo 6, 2005 iti 4:45 ti malem iti pagtaengan ti agnagan ti Josefina Juan iti nasao nga ili.
Naamuan ni Abing a tallo dagiti suspek ti pammapatay ngem immunan a natiliw ti maysa.
Inbatad na nga inbutaktak ti Top 4 wanted person no sadinno ti lugar ti kaduana rason a napan da tiniliw idiay Bulacan a maibilang a Top 3 wanted person.
Segun kenni Abing, ballaigi a natiliw da ti Top 3 wanted person iti Bulacan ken nakuna ti maseknan a plano na met ti sumuko kadagiti otoridad.
Ti Top 4 wanted person ket agtawen ti 36, idinto a ti Top 3 ket agtawen ti 38 ken sumangsango da ti kaso nga Attempted Roberry with Homicide.
Inlawlawag ti hepe nga agtakaw ti gagem dagiti tallo a suspek iti kallabes iti pagtaengan ti hapon ngem gapu ta nakapout daytoy ket dita a binagko-bagkong da.
Agawiden ti grupo ni Captain Abing agraman ti Top 3 Wanted person ken ti warrant of arrest nga iggem da.
