LAOAG CITY – Inbatad ni Mr. Wincy Ayunon, nagturpos iti Mariano Marcos State University iti ciudad ti Batac ken Top 4 iti kalepleppas a September 2026 Psychometrician Licensure Examination, nga engineering ti 1st priority na ngem idi agenrol koman ket kinasarita daytoy ti program coordinator ti Psychology Program.
Kuna na a napanunot na a napintas ti programa isut gapuna a naallukoy nga isu laengen ti alaen na.
Inrakurak na a kalpasan ti pannakaipasa na iti nasao nga eksaminasyon ket plano na ti agtrabaho ken apaman a makaurnong ket mangala iti masteral gapu ta kayatna ti agbalin a Psychologist.
Mainaig iti daytoy, inbalakad na kadagiti mangala iti nasao nga eksaminasyon a masapol nga addaan dagitoy ti naan-anay a panagturog ken panagkararag iti Diyos.
Kuna na a no adda ti naan-anay a pannaturog ket napintas ti panagtrabaho ti panunot ken makapagreview a nasayaat, kasapulan ti consistency ken disiplina iti bagi, kasapulan pay a biruken ti oras nga isu ti kasayaatan a panagreview, ken ti kangrunaan ti amin ket agtalek iti bukod a bagi.
Inlawlawag na a ti psychometrician ket isuda ti ag-administer, ag-score, ag-interpret ti psychological test ken mangiyuswat ti interview iti babaen ti superbisyon ti psychologist.
Inpasingked ni Ayunon a kaykayat na ti agtrabaho ditoy Pilipinas gapu ta makita na ti panagkurkurang ti psychology services ngem ti mapan iti sabali a pagilian.
