LAOAG CITY – Balligi a naarestar ti Top 5 most wanted person ditoy probinsya ken sumagsango iti kaso a panangrames.
Binigbig ni PLt. Rudy James Jacalne, hepe ti PNP iti ili ti Piddig ti akusado nga agtawen ti 32, alyas Enold, addaan ti live-in partner, mannalon ken residente iti Brgy. 10 Arua-ay iti nasao nga ili.
Segun ken ni Jacalne, ti akusadao ket natiliw iti Sitio Manayon iti Brgy. 23 iti ili ti Sarrat babaen iti nagtipon a pwersa ti PNP-Piddig ken PNP-Sarrat.
Kuna na a balligi ti pannakarestar daytoy kalpasan a naiserbi ti warrant of arrest nga inyetnag ni Hon. Dina Maritel Morales Pacquing, presiding judge ti RTC branch 11 ditoy siudad gapu iti kaso a pannagrames.
Naipadalan iti medical examination ti akusado ken nagtalinaed iti kustodyar ti PNP bayat a maiyur-uray ti pannakaipaima na iti korte a naggapoan ti warrant of arrest.
Kabayatanna, awan ti nairekomendar a piyansa iti akusado.
