LAOAG CITY – Inbatad ni Mr. Alwin Jay Pascua, Top 6 iti Nurse Licensure Examination ken nagturpos iti Mariano Marcos State University (MMSU) iti siudad ti Batac nga uppat dagiti nagbalin nga inspirasyon na a tulbek ti pagballaigi na iti arapaap na, ti agbalin a naan-anay a maysa a nurse.
Segun kenkuana, dagiti uppat a nagbalin nga inspirasyon na ket ti Diyos, dagiti agbalin to a pasyente na ken agkasapulan to ti serbisyo na, pamilya na ditoy Pilipinas ken abroad, ken ti ina na nga adda ti sakit na.
Inadamitir na nga idi umuna a bolan ti panagreview na ket narigatan gapu ta saanna nga ammo no siasinno dagiti agbalin nga inspirasyon na ken motibasyon na tapno agballaigi.
Mainaig iti daytoy, inlawlawag na a kabayatan ti panagreview na ket ado dagiti nagbalin a karit kenkuana gapu ta malaksid a narigat ti agreview gapu ta ado dagiti scope a kasapulan nga adalen da, ken adda pay ti mental health issues na.
Kabatayatanna, inpakaammo ni Pascua a nagenroll iti maysa a review center ngem kaadoan ket nagself-review gapu ta saan nga agpada ti timeline ti panagreview da iti timeline a kayatna.
