LAOAG CITY – Natiliw ti top 8 drug personality ti Ilocos Norte babaen ti naiwayat a drug buy bust operation iti merkado publiko iti ili ti Bacarra.
Nabigbig ti subject ti operation a ni Jovencio Matias, agtawen ti 40, naasawaan ken residente iti Brgy. 40 Buyon iti ili ti Bacarra.
Basar ti impormasyon, insayangkat dagiti kameng ti Provincial Drug Enforcement Unit babaen ti pannakikammayet da iti Pnp Bacarra.
Nagatang ti nagpammarang a gumatang ti iligal a druga ti maysa a sachet a naglaon ti maipagarup a shabu usar ti 1,000 peso bill kas marked money.
Narekobre dagiti otoridad ti walo a sachet a naglaon ti maipagarup a shabu ken drug paraphernalia iti ikot ni Matias.
Segun iti asawa ni Matias, napan nakitienda iti nasao nga ili idinto a nakalugan ti subject iti van a nagmaris ti maroon ken addaan ti plate number UMK 910 idi ta naiwayaten ti nasao nga operasyon.
Nagkedked ni Matias nga agsarita iti biang ti Bombo Radyo Laoag.
Kabayatanna, kinumpirmaran ni Police Chief Master Sergeant Harold Nicolas nga adu a validation ti insayangkat da sakbay nga inoperasyonan da ni Matias.
Inbatad na nga iti dumaya a paset ti Ilocos Norte ti lugar a agop-operaran ti subject ken addaan iti source a pagal-alaan ti maipagarup nga iligal a druga.
Naamuan ti Bombo Radyo nga agtrabratbaho kas kapintero ti nasao a subject ti operasyon.
