LAOAG CITY – Inbatad ni Miss Aizel Maniago, Top 8 iti Nurse Licensure Examination nga agpapan ita ket arigna agtagtagainep paylaeng gapu ta ti laeng gagem na ket makagun-od ti 80 agpangato nga average para iti board rating.
Segun ken ni Maniago, ti kangrunaan a nagbalin nga inspirasyon na kabayatan ti panagreview na ket ti pamilya kangrunaan na dagiti nagannak na.
Inlawlawag na a saanda a nabaknang ngem gapu ti panagtintinnulong dagiti nagannak na kangrunaan na ti ama na ket napagturpos da daytoy iti kurso a nursing.
Inpakaammo na pay a siyam a tawenen a saan a nakaawid ti ama na manipod iti panagtrabtrabaho na idiay Saudi Arabia tapno laeng mapagturpos da daytoy iti kolehiyo.
Innayon na nga a adda ti sagsagabaen a sakit ti ama na isut gapuna a ti kangrunaan a gagem na ket ti makaawid koma ti amana a nasalun-at paylaeng.
Nagyaman pay ni Maniago kadagiti papagayam ken kangrunaan ti amin ket ti Diyos nga isu ti nangawag kenkuana para iti inturpos na a kurso.
Kabayatanna, kuna ni Maniago a kabayatan ti panagadal na agingga iti panagreview ken panageksamen na ket saan a maliklikan nga adda latta dagiti pannubok a pasaren na ngem amin a nagbalin nga addang na ket inkomit na iti Diyos, no sadinno nga amin a kalikagom na ket saa a pinaay ti namarsua.
Ni Maniago ket nagturpos iti Mariano Marcos State University (MMSU) iti siudad ti Batac.
