LAOAG CITY – Balligi ti pannakatiliw ti Top 8 Most Wanted Person iti Regional Level babaen ti bileg ti warrant of arrest.
Ti akusado ket agtawen ti 38, awana ti asawa, mannalon ken residente iti Barangay Poblacion 2 iti ili ti Pagudpud.
Ti nadakamat a lalaki ket Top 4 Most Wanted Person pay ditoy Ilocos Norte ken Top 2 Most Wanted Person iti Municipal Level partikular iti Pagudpud.
Natiliw daytoy idi laeng kalman iti Brgy. Magsaysay, Sinait, Ilocos Sur gapo iti kaso na a panagrames babaen ti nagtipon a pwersa ti Criminal Investigation and Detection Group Ilocos Norte pakairamanan ti PIDMU INPPO, Pagudpud Municipal Police Station, PN-Banna, 144th SAC/SAF, Pat Eduardo Farinas iti PNP-Magsingal ken babaen iti koordinasyon iti Sinait Municipal Police Station.
Ti warrant of arrest ket inparuk-at ti Presiding Judge ti Regional Trial Court, First Judicial Region Branch 19 iti ili ti Bangui gapo iti 2 counts ti Statutory Rape.
Awan met ti nairekomendar a pyansa ti akusado para iti temporaryo a pannakawaya-waya na.
Naamoan a ti akusado ket namindua na a rinames ti karruba na nga agtawen ti 12.
Iti agdama, nagtalinaed ti akusado iti kustudiyar ti Criminal Investigation and Detection Group ken manamnama a maipaima iti korte a naggapoan ti warrant of arrest.
