LAOAG CITY – Saan a nalaka a maiturpos ti panagadal nangruna nu nataengan ti maysa nga agad-adal.
Daytoy ti inpasingked ti Top 9 iti kalepleppas a 2021 nursing Licensure Examination (NLE) a ni Ailene Rarangol ken residente iti Brgy. 11 iti ili ti Sarrat.
Nu pay kasta, kuna ni Rarangol a saan a lapped ti tawen tapno maaddaan ti edukasyon.
Inbatad na a babaen iti anus ken kalikagum a maiturpos ti ikagkagumaan a kurso ket awan ti imposible.
Inlawalawag na a saan a kas kadagiti nagbalin a classmate na nga ubbing pay ket agtawen isuna ti 35 idi nangrugi nga agadal iti nursing ken naiturpos na iti tawen na nga 40.
Segun ken ni Rarangol, saan a nalaka ti panagreview na para iti eksaminasyon gapu iti pandemiya.
Kuna na nga adda dagiti gundaway a narigat ti koneksyon iti internet ken adda ti iraprapin na nga anak.
Nu pay kasta, inbatad na a gapu iti panagkarkararag a nabuyugan ti determinasyon ket nagballigi.
Immunan nga inpakaammo ni Rarangol a nairugi na ti nagreview para iti eksaminasyon idi 2020.
Nu pay kasta, saan na a naituloy gapu iti panagsikog ken panagpasngay na.
Innayun na nga adda iti plano na a mairaman iti Top 10 rason nga ingaed na ti nagreview ket nagun-od na ti maika-siyam a pwesto.
Kabayatanna, naamoan a sakbay a nangala iti kurso a nursing ni Rarangol ket immunan a nagturpos iti kurso nga Electronics and Communication Engineering iti Northwestern University ditoy siudad ti Laoag.
