LAOAG CITY – Kinumpirmaran ni Dr. Loida Valenzuela, Provincial Veterinarian nga ad-adalen da ti regulatory action da para iti rekomendasyon da kenni Gov. Matthew Marcos Manotoc mainaig iti bird flu iti Bulacan ken Pampanga.
Segun kenni Valenzuela, karaman a kitaen da ket no kasano ti kadagsen ti epekto na no ipatungpal da ti total ban iti pannakaserrek ti manok manipud kadagiti nadakamat a lugar.
Inbatad na pay nga adalen da no mabalin nga iti laeng mismo lugar a nagpositibo iti bird flu iti probinsya ti Pampanga ken Bulacan ti pawilan da a makaiserrek ti manok ditoy Ilocos Norte.
Kunana nga agkalkalap da ti kumpleto a detalye wenno impormasyon iti pannakaiyuswat ti test kadagiti sample manipud iti Nueva Ecija.
Inpalgak na a no total ban ti maipatungpal kadagiti nadakamat a probinsya ket dakkel ti epekto na kadagiti fast food chains ditoy probinsya gapo kaadoan nga storages ti manok ket manipud kadagiti nakadamat a lugar.
Mainaig iti daytoy, kunana nga iti agdama ket naiget a mamonitor dagiti maiserserrek a manok, ken kadagiti online seller iti kakastoy ket masapol a sumurot da iti pagalagadan.
Kunana a magutgutigot met dagiti fast food chains a saan nga iti apektado a lugar ti paggapoan ti ilako da no diket agala da pay laeng iti sabali a probinsya.
