LAOAG CITY – Inpakaammo ni Bombo International News Correspondent JB Lagmay manipod iti Nova Scotia, Canada a nagasatda gapu ta naimatanganda ti total solar eclipse iti pagilianda.
Segun kenkuana, agarup 4:30 ti malem, oras idiay Canada ket nakitada ti total solar eclipse no sadino ket simmipnget iti aglawlaw ken iti tangatang iti las-ud ti 15 agingga 20 a minuto.
Inbatadna a kalpasan laeng ti sumagmamano a minuto ket simmukat ken nagsubli ti raniag ti init nga arig nagsubli ti normal a situasion iti lugar.
Kunana a naidumduma ti aldaw a napasaranda gapu ta maibilang daytoy a naisangsangayan kadakuada.
Mainaig iti daytoy, kuna ni Lagmay ket sakbay pay a naimatangan ti total solar eclipse ket addan ti inparuk-at a pakdaar ti Police Department kadagiti motorista ken turista tapno maliklikan ti saan a napintas a mapasamak.
Inpalgakna a naballaagan dagiti amin nga agiturturong ti lugan a saan nga agsardeng iti biaheda bayat a mapaspasamak ti total solar eclipse.
Innayonna a nagbalin a normal wenno ordinario laeng kadagiti amin a tattao a nakaimatang iti total solar eclipse.
