LAOAG CITY – Nangrugin a naisayangkat ti Tour of Luzon ditoy Ilocos Norte.
Segun ken ni P/Maj. Kristian Lee Badua, pannakangiwat ti Ilocos Norte Police Provincial Office, simmangpet ti amin a bikers a nakipaset iti nasao nga aktibidad iti ili ti Pagudpud idi kalman.
Inbatadna nga ita nga aldaw ti Mayo 5 ket adda ti panaglinnumbada a mangrugi iti sango ti Poblacion iti ili ti Pagudpud nga agturong iti Bangui bypass.
Kunana nga inton Mayo 7 ket adda ti panaglinnumbada a mangrugi iti sango ti Poblacion iti ili ti Pagudpud nga agturong iti Saint Augustine Parish Church iti ili ti Paoay.
Inlawlawagna nga iti maudi a panaglinnumbada inton Mayo 8 ket mangrugi iti sango ti Marcos Hall of Justice ditoy siudad ti Laoag nga agturong idiay Candon City, Ilocos Sur.
Innayonna a saan a basta-basta a dumalyasat wenno bumallasiw kadagiti kalsada a pagdalanan dagiti bikers tapno maliklikan ti saan a napintas a mapasamak.
