LAOAG CITY – Pormal a dinutukan ni Presidente Ferdinand Marcos Jr. ni dati a Tourism Sec. Christina Garcia Frasco kas Presidential Adviser for Sustainable and Resilient Communities, kalpasan ti sumagmamano a lawas nga ispekulasyon mainaig iti panagbaba na iti pwesto kas sekretaryo ti Department of Tourism.
Basar iti Malacañang, binili ni Presidente Marcos ni Frasco nga idaulwan ti pannakapapigsa ti pannakaipatungpal ken agtultuloy a pannakaisayangkat dagiti prayoridad a programa kadagiti komunidad, partikular kadagiti lugar a masansan a tamaan ti kalamidad ken climate-related risks.
Kagiddan ti baro nga obligasyon ni Frasco, agserbi met ni Department of Tourism Undersecretary Verna Buensuceso kas officer-in-charge ti nasao nga ahensya tapno masigurado nga agtultuloy ti operasyon na.
Ti appointment ni Frasco ket dimteng iti baet dagiti pammabalaw a naawat na mainaig iti maipagarop a “self-promotion” iti tourism materials ti gobyerno, banag a naiget na a naglikudan.
Iti baet ti kontrobersyal, nagtalinaed a nangato ti panagtalek kenkuana ti presidente aglalo iti kabaelan na isut gapuna a dinutukan na daytoy iti nalawlawa a papel a nakatutul iti pannakapatalged dagiti komunidad.
Ti nasao nga addang ket makitkita kas paset ti nalawlawa nga inisyatibo ti administrasyon tapno masolusyunan ti epekto ti climate change ken extreme weather events iti pagilian, aglalo ket iti laeng kallabes ket inreport ti Philippine Atmospheric, Geophysical and Astronomical Services Administration (PAGASA) ti masansan a panagpasar ti nakaro wenno napigsa a bagyo ken heat waves iti rehiyon.
