LAOAG CITY – Maysa a “winter wonderland” iti Sichuan province idiay China ti nagtennag iti eskandalo kalpasan a naduktalan dagiti bisita a ti naikari kadakuada a niebe ket naaramid laeng iti kapas.
Ti Chengdu Snow Village a nabirngasan kas “winter wonderland” ket nangiruar kadagiti ads a mangipakpakita ti napupuskol a yelo kadagiti pagtaengan.
Nupay kasta, idi inarak dagiti turista tapno mangala ti ladawan, nadismayada idi naduktalanda a ti puraw nga “snow” ket dadakkel a pedaso laeng ti kapas.
Nagwaras iti online dagiti ladawan dagiti kapas ken arig puraw a bedsheet nga adda ti makita nga stapler.
Kalpasan a nakaawat ti kritisismo, nangiparuk-at ti pammakawan ti mangimatmaton ti Snow Village.
Segun kenkuana, saanda a ninamnama a nakapsot ti snow ita a tawen. Gapu iti daytoy, pinadasda a nangaramid ti kasla winter wonderland nga ambience babaen kadagiti sumagmamano a kagamitan kas ti kapas, white sand ken dadduma pay a banag.
Mainaig iti daytoy, indiayada ti refund kadagiti nadismaya a bisita.
Gapu iti reklamo, napaserraan ti pagpasiaran ken im-imbestigaren dagiti otoridad iti posible a kaso a false advertising.
Naammoan a saan daytoy ti umuna a daras a naallilaw dagiti turista idiay China. Iti kallabes, maysa a nalatak a waterfalls ti naduktalan nga aggapu iti tubo ti danom nga agay-ayos iti daytoy.
