LAOAG CITY – Nagballaag ti Toxic Watchdog iti publiko seknan kadagiti sumagmamano a bangbanglo a mailaklako kadagiti mall ti naduktalan nga addaan daytoy ti makasabidong a kemikal.
Iti market survellaince ti Ecowaste Coalition a naisayangkat idiay Makati, Manila ken Quezon City, naduktalan ti toxic watchdog a 36 a produkto a bangbanglo manipud kadagiti 16 brands ti addaan ti butylphenyl methylpropional (BMHCA) wenno ad-adda nga am-ammo iti awag a lilial o lysmeral kas ingredient.
Basar iti watchdog, ti panaglako kadagiti nasao a produkto ket naglabsing iti Food and Drug Administration (FDA) Circular No. 2023-007 a mangipawpawil iti panagusar ti butylphenyl methylpropional kadagiti kosmetiko.
Basar pay iti Ecowaste, nagballaag dagiti eksperto maipapan iti peggad iti BMHCA a maikonektar iti reproductive toxicity, endocrine disruption ken allergic reactions.
