LAOAG CITY – Natay ti maysa a trabahador iti maipatpatakder a dakkel a mall iti Brgy. 51-B, Nangalisan ditoy siudad ti Laoag kalpasan a nakuriente.
Nabigbig ti biktima a ni Michael John Santiago y Dalicon, agtawen iti 34, naasawaan, stay-in worker iti nasao a dakkel a mall ken residente ti Brgy. Bonoan, Dagupan, Pangasinan.
Basar iti Laoag City Police Station, nakaawat ti tawag ti Duty Security Guard a ni Freddie Sinfuego Lactam manipud iti maseknan a kontraktor a nakitada ti biktima a nakadasay nga awan ti puotna a nakaiggem ti spotlight stand a nakakonektar iti live wire.
Gapu iti daytoy, timmawag ti Security Guard iti Department of Public Safety Paramedics para iti pannakaitaray ti biktima iti ospital.
Nupay kasta, basar iti post mortem examination ni Dr. Rodrigo Catcatan, City Health Officer a naideklara a pimmusay ti biktima gapu iti Cardiac Arrest secondary to Electrocution.
Kabayatanna, naammoan nga addan ti uppat nga orasen ti napalabas sakbay a nakita ti biktima.
